വയല്‍

അരാഷ്ട്രീയ പ്രണയം

ട്രാഫിക്സിഗ്നലില്‍ പച്ചവെളിച്ചം 

കാത്തു കഴിയവേ ഇടതുട്രാക്കിലെ

ലാന്‍ഡ്‌ക്രുയിസറിലവള്‍.......................

മുടിച്ചുരുളുകള്‍ക്കിടയിലൂടവള്‍ ‍

പ്രണയാതുരമായ കണ്ണുകളോടെ

നോക്കുന്നതായെനിക്ക് തോന്നുന്നു

ഫെയിസ് ബുക്കിലും ഓര്‍കൂട്ടിലും

എത്ര കാത്തുനിന്നിട്ടും

അവള്‍ വന്നില്ല

ഇരുണ്ട മരുഭൂമിയിലെ

പായല്‍ പിടിച്ച പ്രണയം

കള്ളിച്ചെടിയില്‍

സംഭരിച്ച സ്നേഹജലം  

അഴിമുഖത്തു നങ്കൂരമിട്ടിരിക്കുന്ന

ബോട്ടുകള്‍

സന്ധ്യാസമയത്തെ

സിന്ദൂരം കലര്‍ന്നാകാശം

അതോ

പ്രണയത്തിനുവേണ്ടി

വീരമൃത്യു വരിച്ചവരുടെ

ചോരപ്പുഴയാകാശമോ

ഇന്നലെ പെയ്ത മഴ പോലും

പ്രണയപ്പനിച്ചൂട്

കൊണ്ടെന്നെപ്പൊതിയുന്നു

ബഷീറിന്‍റെ  തത്വചിന്തയും

കാഫ്കയുടെ ഇതിവൃത്തവും

പൌലോ കൊയ്‌ലോയുടെ   ശൈലിയും

പാമുകിന്റെയും ആനന്ദിന്റെയും

ചരിത്രബോധവും

കൂട്സെയുടെ സത്യസന്ധതയും

വാന്‍ഗോഗിന്റെ ...ഭ്രാന്തും

ഗൊദാര്‍‍ദിന്റെ നിര്‍ഭയത്വവും

വിജയന്‍റെ ദാര്‍ശനികതയും

നമുക്കിഷ്ടമായിരുന്നു

ചാറ്റ്റൂമിന്‍ ‍ നിശബ്ദതയില്‍

വലവിരിച്ചു കാത്തിരുന്നപ്പോള്‍

അവള്‍ വന്നു

വിശപ്പിലും തീറ്റയിലും

ഭക്തിയിലും പ്രാര്‍ഥനയിലും

കാമത്തിലും സുരതത്തിലും

പ്രണയമുണ്ടെന്ന്

ഞാന്‍ പറഞ്ഞു

എനിക്ക് പ്രണയമാണ് നിന്നെ

നീയില്ലെങ്കിലുമെന്നു ഞാന്‍

എനിക്ക് പ്രണയമാണെന്നെ

ഞാനില്ലെങ്കിലുമെന്നു നീ

ഞാനും  നീയുമങ്ങനെയേകമെന്നു ഞാന്‍

ഏകമല്ലാത്തതിനെയേകമെന്നു

വാക്കുകള്‍ കൊണ്ടാനകളിക്കുകയാണ്‌

ഞാനെന്നു നീ

യാതൊരു വെബിലും കുരുങ്ങാതെ

എന്റെയെല്ലാ ലിങ്കുകളും ഫോട്ടോകളും

 വീഡിയോകളും  അപ് ലോഡുകളും  

 ഡൌണ്‍‍ലോഡുകളും   പോസ്റ്റുകളുമുപേക്ഷിച്ചു

   അവളന്ത്യമായി മൊഴിയുന്നു

ഞാന്‍ നിന്നെ പ്രണയിച്ചിരുന്നില്ല...........