മധുരനാരങ്ങ

നീ വരുന്നതിനു മുന്‍പേയവള്‍

തൊലി കളഞ്ഞിരുന്നു.

അല്ലികളോരോന്നായെടുത്ത്

വേരും നാരും പറിച്ച്

(ശാസ്ത്രീയമല്ലെങ്കിലും)

വീണ്ടും കഴുകി

ജാറിലിട്ടു വെച്ചിരുന്നു.

നീ വന്നയുടനെ

ബട്ടണമര്ത്തുകയെ വേണ്ടൂ

സ്വയം വേദനിച്ചാലും

നിന്നെ വേദനിപ്പിക്കാതെ

കാത്തു നിര്‍ത്താതെ

ദാഹവും വിശപ്പുമറിയിക്കാതെ

അവഗണനയുടെ

കയ്പ്പ് കുടിപ്പിക്കാതെ

കണ്പീലികളില്‍

കരടു വീഴാതെ

സൂക്ഷിക്കും.

പ്രണയിപ്പിക്കാനായി

സ്നേഹത്തിന്റെ

ഉപ്പ് രുചിപ്പിക്കും.

നീ

കാടിന്റെ

മണ്ണിന്റെ

കോടമഞ്ഞിന്റെ

തെളിനീരുറവയുടെ

തണലിന്റെ

മരക്കൂട്ടങ്ങള്‍ക്കിടയിലൂടരിച്ചിറങ്ങുന്ന

സൂര്യോദയത്തിന്റെ

അസ്തമനത്തിന്റെ

ചിത്രങ്ങള്‍

മാത്രമറിഞ്ഞെന്കിലവള്‍

അത് തന്നെയാണ്.

അതു കൊണ്ടാണവളവയുടെ

തണുപ്പിനെ

ചൂടിനെ

സമാശ്വാസങ്ങളെ

നിനക്ക് നല്‍കുന്നത്.

പ്രണയത്തിന്റെ

രുചിയറിയിക്കാന്‍.

അവഗണനയുടെ കയ്പ്പ്

വിരഹത്തിന്റെ തീ

എത്രമേലസഹ്യമാണെന്നു

ബോധ്യപ്പെടുത്താന്‍.

അതുകൊണ്ടാണവള്‍

ഓരോ അല്ലിയും

ഇത്രമേല്‍ സൂക്ഷ്മമായി

കഴുകിയെടുത്തത്.

അതിശുദ്ധി

ഫാസിസമാണെന്നറിഞ്ഞിട്ടും

ഞാനവളോട് പറഞ്ഞിരുന്നു

പഞ്ചസാരക്ക് പകരം

ഉപ്പാണ് നല്ലതെന്ന്.

അതുകൊണ്ടവള്‍ രണ്ടും

സമാസമം ചേര്‍ത്തു.

എന്റെ സ്നേഹതീവ്രതയെ

നിനക്ക് സഹനീയമാക്കാന്‍.

അവള്‍

സ്റ്റീഫന്‍ഹോക്കിങ്ങിന്റെ ജെയിനോ

സാര്‍ത്രിന്റെ മദാം ബുവ്വെയോ

ഹിട്ലെറുടെ കാമുകിയോ

ക്രിസ്തുവിന്റെ മഗ്ദലനക്കാരിയോ

ഒന്നുമല്ല.

ഒടുവില്‍

ഞാന്‍ പ്രണയിച്ചു പോവുക

അവളെയായിരിക്കും.